Gangmaekers en Gangmaekerinnekes, gaer sjtèl ich mich aan uch väör es 59e Prins vanne Gangmaekers. Ein groeate ieër woea ich zelf gein moment raekening mèt haaj gehaoje. Toet ‘t moment det Vorst Sebastiaan mich benaderdje väör dees rol en ‘t vastelaovesblood begós te sjtruime woea ‘t neet kin gaon…
Väör de minse die mich nog neet kinne; mien naam is David Peters, ich bön 40 jaor en dit jaor 11 jaor getrouwdj mèt mien allerleefste Yoni. Wae woeane op ‘t Sjlejdal mèt ós twieë kinjer; dochter Julie (9 jaor) en zoontje Jesse (6 jaor). In ’t dageliks laeve bön ich wèrkzaam es komersjeel mennezjer biej BASF | Nunhems, produsent van greuntezaod en inne volksmóndj ouch bekèndj es ‘t Zäödje’. Same mèt mien kollega’s wèrke we dageliks aan ‘t óntwikkele van de greunte-oplossinge vanne toekomst. Get waat mich echt aan ‘t hert geitj.
Van jóngs af aan kloptj mien hert väör de vastelaovendj. Det kan ouch bienao neet angers es aafsjtammeling van de femiliej Peters. In 1998 waas ich Jeugdprins en kórt daonao waerdje ich lid van de Baerekepel en waas ich betrókke bie de oprichting van de HAJ (Haelder Aod Jeugdprinse, Prinsesse en Adjedante). Daobie bön ich lid gewaestj van ‘t AB (Algemein Besjtuur) vanne Gangmaekers en höb ich es prizzentator jaorelangk de Pekskesaovendj aanein moge kalle.
In mien vrieje tied doon ich gaer inne hoeaf knommele, fietse en geneet ich es bourgondiër van koeake of oet aete mèt femiliej of vrunj. Mer mien allergroeatste hobbie is toch waal ‘t sjrieve van vastelaovesleedjes. Get woea ich al mien kreativiteit in kwiet kèn. Ich sjrief zoeawaal leedjes väör Haelder es anger Limburgse artieste wie Marleen Rutten of Roy Selder. Väörluipig hoeagtepuntj es sjriever waas in 2023 wie 2 van mien leedjes de finale van ‘t LVK bereikdje, woea ónger os eige Haelder jonges van Sjöppe Aos.
Ich moog mich gelökkig prieze met mien 3 Adjedante; Rhodri van Dooren (ouch mien adjedant in 1998!), Willem Delhoofen en Guus van Engelen. Degene die op vastelaovesmaondig in Kefee Oppe Linj op sjtap gaon zulle ós vast herkènne es wae dao duchtig de bieëst oet hange same mèt de anger lede van de GAAS-app 😊. Ich houp det de Gangmaekers weite woea ze aan zeen begós..!
Same mèt ós dames zeen we inne zomer in ‘t geniep begóstj mèt ‘t sjrieve van dit book en wae kinne neet wachte óm same mèt uch aan ’t echte werk te gaon beginne.
’t Is mich ein ieër óm uch mèt mien Adjedante dit jaor väör te moge gaon. Es echte Haelder jónges verheuge wae ós d’r op om d’r same mèt uch eine ónvergaetelikke vastelaovendj van te make en ‘t Gangmaekersriek te laote sjödde op zien gróndjveste. Det kan allein es gae uch bie ós aansjloet. Want, sónger uch geine Bóntje Aovendj, geine Optocht en geine sjaele zeiver… Daoróm miene liefsjpreuk:
“Vastelaovendj, det zeetj gae!”
